Hraunavinir

Á fundi sem Hanna Birna Kristjánsdóttir hélt föstudaginn 27. september mættu fulltrúar Hraunavina og annarra náttúruverndarsamtaka, ásamt fulltrúum Vegagerðarinnar og bæjaryfirvalda í Garðabæ.

Vinnuhópur var settur á laggirnar til að reyna að sætta sjónarmið og mun verktakinn einbeita sér að öðrum þáttum veglagningarinnar næstu sjö til tíu daga og ekki fara í framkvæmdir í Gálgahrauni á meðan.

Ráðherra fól Vegagerðinni að ræða málið við verktakann og kynna breytta vinnutilhögun fyrir fulltrúum náttúruverndarsamtaka í næstu viku.

Athyglisverð frétt birtist á heimasíðu Vegagerðarinnar 27. september, sem lýkur á eftirfarandi fullyrðingu: „Fulltrúar Garðabæjar sögðu alveg ljóst að skipulagi yrði ekki breytt þannig að nýi vegurinn yrði fluttur úr hrauninu í núverandi vegstæði.“

Þetta er merkilegt orðalag og þessi frétt á heimasíðu Vegagerðarinnar er í þeim anda að það er full ástæða fyrir alla sem vilja bjarga Gálgahrauni að vera áfram á varðbergi.

Hraunavinir mynduðu mannlega keðju í og við Gálgahraun í dag og náðu að koma í veg fyrir að gröfurnar færu inn í hraunið. Baráttan heldur áfram.

Skarphéðinn Snorrason flaug fjarstýrðu flygildi yfir Gálgahraun og myndaði það úr lofti eins og sést á meðfylgjandi myndbandi, sem Árni Haraldsson klippti saman.

Smellið á þessa slóð:

https://vimeo.com/74594968

Nokkrir Hraunavinir voru mættir í Gálgahraun að morgni 16. september á Degi íslenskrar náttúru. Þar á meðal var afmælisbarnið Ómar Ragnarsson. Þarna var líka formaður Hraunavina Reynir Ingibjartsson og fleira fólk.

read more »

Þrátt fyrir norðankulda og talsvert hvassviðri komu um 200 manns saman á bílastæðinu við Prýðahverfi við Álftanesveg sunnudaginn 15. september og gengu fylktu liði með græna fána og íslenska fánann í áttina að Garðastekk.

Gengið var að þeim stað þar sem skurðgrafa vann óbætanlegt tjón á hraunjaðri Gálgahrauns föstudaginn 13. september. Þar var fánum komið fyrir í sárinu eftir gröfuna. Í lok göngunnar var eftirfarandi ályktun samþykkt:

Ályktun samþykkt í mótmælagöngu um Gálgahraun 15. september 2013:

read more »

Að morgni föstudagsins 13. september var farið með skurðgröfu inn í Gálgahraun og þar hafa verið unnar óafturkræfar skemmdir, sem sjást hér á meðfylgjandi ljósmyndum. Þetta er mjög nálægt fornminjunum Garðarstekk og gömlu fjárborginni, sem eru merkar minjar og gamalli þjóðleið sem hefur sögulegt gildi. 

Tökum höndum saman  –  Verndum Gálgahraun

Sýslumaðurinn í Reykjavík hefur hafnað beiðni fernra umhverfisverndarsamtaka um lögbann á lagningu vegar í Gálgahrauni þar sem samtökin eigi ekki lögvarða hagsmuni í málinu. Kæra vegna þessarar synjunar sýslumanns hefur þegar verið lögð fram til úrlausnar héraðsdóms.

Ennfremur er nú rekið mál fyrir héraðsdómi Reykjavíkur á hendur vegamálastjóra til viðurkenningar á ólögmæti vegaframkvæmdanna.

Á sama tíma eru framkvæmdir hafnar við fyrirhugaðan Álftanesveg og aðeins dagaspursmál hvenær farið verður að mylja hraunið undir veg.

Til að mótmæla þessu ætla hraunavinir að safnast saman í Gálgahrauni á sunnudaginn kemur, 15. september kl.tvö (14.00) og koma fyrir fánum í fyrirhuguðu vegstæði Álftanesvegar.

Safnast á saman við innkeyrsluna í Prýðishverfi (Gálgahraun) norðan núverandi Álftanesvegar.

Þátttakendur eru hvattir til að hafa með sér íslenska fána, en auk þess verða grænir fánar til staðar. Gengið verður frá hringtorgi við Hraunsholtsbraut og fánum komið fyrir og að Garðastekk, vestan Gálgahrauns.

Næsta dag, mánudaginn 16. september er Dagur íslenskrar náttúru og afmælisdagur Ómars Ragnarssonar. Það er mikilvægt að allir velunnarar Gálgahrauns og um leið íslenskrar náttúru, taki forskot á sæluna og mæti með fána í hönd til verndar Gálgahrauni og öðrum náttúruverðmætum á Íslandi.

Um leið verður að standa vörð um rétt umhverfisverndarsamtaka á Íslandi til aðgangs að réttarúrræðum í málum sem þessum í samræmi við ákvæði EES-samningsins og Árósasamningsins sem Ísland hefur fullgilt. Mál fernra samtaka um ólögmæti framkvæmda í Gálgahrauni er því prófmál sem varðar alla umhverfisverndarsinna.

Búið er að veita á fjárlögum ríkisins á annan milljarð króna í fyrirhugaðan Álftanesveg. Hraunavinir hafa lagt það til við hagræðingarhóp ríkisstjórnarinnar, að spara skattborgurunum þessi útgjöld. Best væri þó að verja þessum fjármunum til Landsspítalans og hugsanlega um leið að bjarga mannslífum.

Látum þetta neyðarkall úr Gálgahrauni berast og fjölmennum þangað á sunnudaginn kl. 14.

Bílastæði má finna við gatnamótin í Prýðishverfið og eins norðan Hrafnistu.

Hraunavinir.

Landvernd, Náttúruverndarsamtök Íslands, Náttúruverndarsamtök Suðvesturlands og Hraunavinir hafa stefnt Vegamálastjóra fyrir hönd Vegagerðarinnar, til viðurkenningar á því að framkvæmd sú um gerð Álftanesvegar milli Hafnarfjarðarvegar og Bessastaðavegar um þvert Gálgahraun, sem Vegagerðin auglýsti með útboði hinn 7. ágúst 2012 sé ólögmæt.

Þau Skúli Bjarnason, hrl. og Ragnheiður Elfa Þorsteinsdóttir, hdl., lögmannsstofunni Málþingi ehf., reka málið fyrir Héraðsdómi Reykjavíkur, f.h. samtakanna.

Hér er um  prófmál að ræða varðandi rétt umhverfisverndarsamtaka og hópa til að láta reyna á fyrir dómi lögmæti framkvæmda sem raskað geta ósnortinni náttúru og valdið óafturkræfum náttúruspjöllum. Síðustu ár hefur átt sér stað mikilvæg réttarþróun í þá veru að styrkja aðkomu umhverfisverndarsamtaka að málum sem þessum.

Í nokkur ár hafa staðið deilur um lagningu nýs Álftanesvegar milli Hafnarfjarðarvegar og Bessastaðavegar. Deilurnar hafa snúist um það hvort leggja skuli hluta hins nýja vegar yfir ósnortið hraun – Gálgahraun í landi Garðabæjar, en hraunið er á Náttúruminjaskrá.

Bent hefur verið á að forsendur fyrir framkvæmdinni hafi gjörbreyst frá upphaflegri áætlun. Byggðaþróun hefur orðið með allt öðrum hætti en spáð var og ekkert útlit er fyrir að þar verði stórfelldar breytingar í bráð sem kalli á viðlík náttúruspjöll. Yfirvöld í Garðabæ og Vegagerðin hafa hins vegar staðið þvert gegn formlegri endurskoðun framkvæmda og athugun á einfaldari, náttúruvænni og ódýrari kostum. Viðhorf almennings og réttarþróun hafa sömuleiðis breyst verulega á þeim rúmu 11 árum sem liðin eru frá endanlegri útgáfu umhverfismats.

Stefnendur telja að útboð það um veginn sem auglýst var 7. ágúst 2012 hafi verið ólöglegt þar sem bæði framkvæmdaleyfi og umhverfismat hafi verið útrunnin, en engar framkvæmdir hafi hafist á gildistíma þeirra. Því þurfi að taka málið upp að nýju og setja í löglegan farveg. Ekki hefur enn verið skrifað undir verksamning.